Семей ядролық сынақ полигоны аумағындағы ядролық туризмге сұранысты қалыптастыратын факторлар: эмпирикалық талдау

Аннотация

Қазіргі заманғы ядролық туризмге қатысты зерттеулер Семей ядролық сынақ полигоны аумағын тәуекелі жоғары, бірақ сонымен қатар танымдық маңызы зор туристік бағыт ретінде қарастырады. Осы зерттеудің мақсаты - полигон аумағына ұйымдастырылатын турларға қатысуға әлеуетті туристердің дайын болуын айқындайтын факторларды эмпирикалық тұрғыда анықтау және сандық бағалау болып табылады. Қазақстан Республикасынан және шет елдерден келген респонденттердің онлайн сауалнамасы (n=948) негізінде полигон туралы хабардар болу деңгейі, оған баруға қызығушылық дәрежесі, сондай-ақ туристік өнімнің негізгі сипаттамаларының маңыздылығы бағаланды. Жиынтық нәтижелерге сәйкес, сауалнамаға қатысқандардың 52,9 %-ы (496 адам) қызықты экскурсиялық бағдарлама, 51,2 %-ы (485 адам) – маршруттардың қауіпсіздігі, 44,6 %-ы (418 адам) - турдың қолжетімді құны, 33,7 %-ы (316 адам) - тарихпен және ғылыммен терең танысу мүмкіндігі, 27,6 %-ы (259 адам) - кәсіби гидтің болуы маңызды деп атап өтті. Интегралды рейтинг нәтижесінде «маршруттардың қауіпсіздігі» даму факторлары арасында 1-орынды, «қызықты экскурсиялық бағдарлама» – 2-орынды, «тарих пен ғылым туралы көбірек білу мүмкіндігі» – 3-орынды, «тур құнының қолжетімділігі» – 4-орынды, «кәсіби гидтің болуы» – 5-орынды иеленді. Зерттеу нәтижелері ядролық туризмді қабылдау қауіпсіздік пен танымдық құндылықтың үйлесімімен анықталатынын растайды, ал баға факторы мен кәсіби гидтің сүйемелдеуі көмекші рөл атқарады.